सम्माननीय प्रधानन्यायाधीशज्यूका विषयमा निकै जोडतोडले उठिरहेका विवाद सम्बन्धमा ‘बोल्नै मिल्दैन, के बोल्नु !’ भनेर नेपाल बारका अध्यक्षले एक सञ्चारमाध्यमलाई जवाफ दिएछन् । उनले हामी धेरैको मनकै कुरा गरेका हुन् । हामी बारभित्र बारिएर बसेकाहरूलाई त्यस्तै भइरहेको छ, बोलौँ बोलौँ लाग्छ, बोल्नै मिल्दैन । घाँटी खसखस–खसखस गर्छ, भित्रैदेखि कुराहरू हुँडलिएर घाँटीसम्म आउँछन्, ओकल्नै मिल्दैन । सम्माननीयज्यूले पटक्कै ठीक गरिरहनुभा’ छैन भन्ने लागे पनि बोल्न मिल्दैन । उहाँले कत्रो भरोसा गर्नुभएको छ हामीमाथि, उहाँलाई कसरी चोट र्पुयाउनू ? त्यसैले यो घटनामा हाम्रो बारले स्याउलाकै बार बराबर निष्प्राण भएर रमिता हेरेर बस्नुपर्छ, बोल्न मिल्दैन । बारको आफ्नै घेराबारा छ भन्ने सबैलाई थाहा छ । बारभन्दा बाहिर निस्किएर हल्ला गर्न मिल्दैन । 

कुनै न्यायाधीशले दिएको आदेशको आलोचना गर्दैमा वा न्यायाधीशको चरित्र वा काम–कारबाहीको विरोध गर्दैमा न्यायपालिकाकै अवहेलना हुन्छ भन्ने हामीलाई पनि लाग्दैन तर उहाँले त्यसलाई अवहेलना मानेपछि हामीले बोल्न मिल्यो त ? 

कति कुरा हाम्लाई पनि चित्त बुझ्दैन । जस्तै स् त्यो तहको मान्छेले आधा दर्जन जन्ममिति बोकेर नबस्नुपर्ने हो । एसएलसी पास गरेको सर्टि्फिकेट खोइ भनेर दुनियाँले प्रश्न उठाइसकेपछि ‘यीऽऽ !’ भनेर सर्टि्फिकेट तेस्र्याउँदा कुरै सकिनेमा ‘लाऽऽ !’ भनेर प्रश्न उठाउनेहरूकै अनुहारमा लोपार्न नहुने नै हो । आफ्ना विरुद्धका उजुरीमा आफैँ न्यायाधीश भएर फैसला गर्न र आदेश गर्न त झनै नमिल्ने हो । तर, के गर्नु, चित्त नबुझे पनि हामीले बोल्न मिल्दैन ।   

हामी–हामीभित्रको आन्तरिक कुरा है ! ठूलठूला आर्थिक विषयमा भएका अन्तरिम आदेशहरूले तस्कर र कालाबजारियाहरूलाई ठूलो फाइदा र सरकारलाई अर्बौंको घाटा भएको कुरामा होइन भनेर हामीले प्रतिवाद गर्ने ठाउँ छैन । त्यो पदबाट त्यस्ता काम भए होला भन्ने हामीले सोच्नु पनि नहुने हो तर यसो हेर्दा खोइ के खोइ के जस्तो देखिन्छ । तर पनि हामी बोल्दैनौँ । बोल्न मिल्दैन के !

 

हामी उहाँका लाइनका मान्छेहरूले बोल्ने बेलै होइन यो । बोली साध्ये भा’पो बोल्नु । बोल्यो कि पोल्यो । बोलेर भन्दा नबोलेरै जितिन्छ । बोलेन भने मनमा लागेका कुरा मनमै बसिरहन्छन् । भित्रै घुमिरहन्छन्, बटारिइरहन्छन् । धेरै भए आफैँलाई भित्रभित्रै पिरोल्छन् । नबोल्दा किन नबोलेको भन्ने एउटा प्रश्न आउँछ, त्यसको उत्तर नबोलेरै टार्न सकिन्छ । बोल्यो भने हजार प्रश्नको सामना गर्नुपर्छ । त्यसैले बोल्नुभन्दा नबोल्नु हाम्रो स्वास्थ्यका लागि लाभदायक छ ।  

हामीले बिनाकारण नबोलेको पनि होइन । राजनीतिमा पोलिटिक्स घुसेकाले नबोलेको हो । राजनीतिमा पोलिटिक्स घुसेपछि एउटा लाइनका मानिसको बोली खुलेका बेला अर्को लाइनका मानिसको मुख बन्द हुन्छ । आफ्नै लाइनका न्यायाधीश, मन्त्री, प्रधानमन्त्री, पार्टी अध्यक्ष वा सभापतिहरूले गरेका र्ओयाइँको विरोध गरेर भविष्यका बाटाहरू बन्द गराउन कसैलाई इच्छा हुँदैन । अझै कति बाँच्नु छ, कति माथि पुग्नु छ, कति अवसरहरूले बाटोमा पर्खिबसेका होलान् । अनि, प्याच्चपुच्च मुख चलाएर आफ्नै घुँडामा बन्चरो किन हान्नू ? यति कुरा सबैलाई थाहा छ । त्यसैले नेपाल बारले किन नबोलेको भनेर कसैले प्रश्न उठाउँदैमा उत्तर दिनु जरुरी छैन । मुख ट्याप्प थुनेर चुपचाप बस्नुपर्छ । हामीले अहिले बोल्न मिल्दैन । 

नेपाल, फाल्गुन २७, २०७४