बूँद रानावस्तु
बनायो के भनी कल्ले मदिरा नामको बस्तु !
बनेको देख्छु ऐले त्यो सबैको कामको बस्तु !! {{read_more}}
मधुशाला कहाँ हुन्थ्यो कहाँ हुन्थे शराबी यी
नशाकै नाम मेटिन्थ्यो न हुन्थ्यो जामको बस्तु !
मजा केमा छ ? सोधेको ,शराबी लठ्ठिँदै बोल्यो –
“मदिरामै भएभरको छ है आरामको बस्तु ! “
यहाँ जे छन् जतिछन् ती सबैका याम आफ्नै छन्
छ यौटै यो मदिरा जो छ जम्मै यामको बस्तु !
छली आँखा जुठो हाल्ने गरेका छन् पुजारीले
कहाँबाट बनोस् चोखो मदिरा धामको बस्तु ?
अँध्यारो चाहना गर्छन् अँध्यारोमै रमाउँछन्
कहाँ खोज्छन् चमेराले उज्यालो घामको बस्तु ?
न कुर्सीको न दौलतको कसैको हो त माटोको
सबैको बूँद के हुन्थ्यो महङ्गो दामको बस्तु ?
