कोही नेता मारिए, मरे
कोही नेता जीवित भए
कोही नेता गए, सिद्धिए
कोही परिपूर्ण निर्मित भए
कोही नेता श्री ३ श्री ५
हजूर बक्सियोस् ख्वामित भए
तर दुख के लाग्छ भने
कोही नेता नेतामै सीमित भए ।

मौका र पद पाउने नेता 
‘गाउँले’ छोडे ‘शहरे’ भए
उजाडिएका पाखा लागेका नेता
ख्याप्प सुकेर खहरे भए
कोही नेता पैदलबाट सोझै
करोड करोडमा चढ्ने भए
कोही नेता असिना पसिना भइ
खाली पैताला मै अड्ने भए

अरूले बालिदिएकै उज्यालोमा
कोही नेताले जुँगामा ताउ लगाए 
देशको हितमा खबरदारी गर्दै
कोही नेताले आफ्नै ज्यान दाउ लगाए
संगसंगै आन्दोलन गरेको संम्झेर 
कोही नेताले छातीमा घाउ लगाए
भुँडी बडाउने पहिरन सजाउनेले
तिनलाई धाउन लाएर झ्याउ लगाए

कोही नेताको बाङ्गोटिङ्गो प्रगति देखेर
कोही नेता आश्चर्य चकित भए
जनताको लागि केही गरौँ भन्ने नेता 
केही सीप नलागि थकित भए
कोही नेता धन धान्य, गण्यमान्य
पदै पदले अलङ्कृृत भए
तर दुख के लाग्छ भने
कोही नेता नेतामै सीमित भए ।

लस एन्जेलस