सानैदेखि चतुर थियो
फिलिंगोको झिल्को थियो
शोषण कहिल्यै सहन्न थ्यो
मुड्की उठाइ बजाइ हाल्थ्यो ।

एकदिन गाउँमा पुलिस आयो
गाउँलाई पुरै घेरा हाल्यो
चतुरेलाई पाता कसि
मुन्ट्याएर लगि हाल्यो ।

केही दिन पछि हल्ला चल्यो
चतुरेले जेल तोड्यो
गाउँमा फेरि पुलिस आयो
रित्तै हात फर्कि गयो ।

आजकल त्यही चतुरेलाई
पुलिसहरूले सलाम ठोक्छन्
घेरा हाली सुरक्षाको
मान सम्मान टक्र्याउछन् ।

चतुरेको रजगज आजकल
गाइँगुइँ सुन्दै कहाली लाग्छ
भेट्न कोही जाँदा खेरि
टिकट काटि कुर्नु पर्छ ।

प्रगति त भयो उसको
जहाजमा सैर गर्छ
चिल्लो कालो पजेरोमा
गाउँमा पनि आउने गर्छ ।