कमरेड !
आज म रेड उडेर
अलि कम रेड भएको छु
अलिअलि रातो
अलिअलि धसिङ्गरे
अनि अलिअलि कसिङ्गरे भएको छु
कमरेड !
आजकल म निठा रातो रङ हराएर
कम रेड
यानेकी रातो कम भएकोछु
बढि अरु नै भएको छु।

कमरेड!
आजकल म बदलिएर
अलि रिमिक्स भएकोछु
कोटमा पाईजामा लगाएर
राम्रैसित झिमिक्स भएको छु
आफैलाई नचिनेर
कन्फ्युजन भएको छु
कनसिरी कन्याउदै
कोट र पाईजामामा फ्युजन भएको छु
गन्तव्य थाहा नभएर
आज इल्युजन भएकोछु

कमरेड !
आजकल 
म भित्र रेड नखोज्नु
लाल सलामको लाल नखोज्नु
समय परिवर्तनशील छ
म पनि परिवर्तन भएकै छु
त्यसैले, कमरेड !
मसग नरिसाउनु
म रेड हराएर 
अलिअली धसिङ्गरे भएको छु
म निष्ठा हराएर
अलिअली कसिङ्गरे भएको छु
म लाल सलाम हराएर
म अलि अलि
दलाल सलाम भएको छु

जे भन्नुहोस् 
शिरोधार्य छ मलाई
समयको माग हो
तपाईं घोडा
र म लगाम भएको छु
तपाईं भिडमा
हराउनुमा मेरो के दोष छ र ?
सबैको मुखमा झुन्डिने
नाम होस या दुर्नाम
एउटा गतिलो सर्वनाम भएको छु !!