१.
बुद्धि विवेक खोपामा राखेर
जोर गाग्री ढोकामा राखेर
आरती उतार्दैछन् भक्तहरू
मालिकलाई सोफामा राखेर ।

२.
केही पूर्व शिकारीहरू
केही पूर्व भिखारीहरू
मुनाफा बाँड्नमै ब्यस्त छन्
सपनाका ब्यापारीहरू ।

३.
जहाँ जस्तो प्रणाली छ त्यहाँ त्यस्तै परिणाम हुन्छ
त्यै घाँसको सेतो दूध बन्छ, त्यै घाँसको पहेंलो गोबर बन्छ
भोजन जतिसुकै स्वादिष्ट किन नहोस्
भुँडीमा पुगे पछि त त्यो पनि फोहर बन्छ ।

४.
गाईलाई पूजा गर्नेकै गाईहरू कुपोषित छन्
नदीलाई पूजा गर्नेकै नदीहरू प्रदूषित छन्
केही भएन खै, पूजा र कथावाचनले
जहाँ रामहरू उपेक्षित छन् र रावणहरू विभूषित छन्

५.
भाषण सुन्यौ हैन ? छक्क परेर सुत
तस्वीर हेर्यौ हैन ? मख्ख परेर सुत
यिनै त हुन् सदाबहार भाग्यविधाताहरू
विश्वास गर अझै अनि ढुक्क भएर सुत ।