कहिले
तिम्रा कलमहरुले
मान्छेका शिर र छातीहरुमा
थाम्नै नसकिने
ताज र तक्माहरु पहिर्‍याउँछन्
र उनीहरुलाई
आकाशमै चढाउँछन् 

कहिले
तिम्रा कलमहरुले
मान्छेका शिर र छातीहरुमा
थाम्नै नसकिने
तीर र तरवारहरु चलाउँछन्
र उनीहरुलाई
पातालमै खसाल्छन्

तिम्रा कलमहरुले
विवेक पुर्‍याएको दिन
अँधेरो रातमा पनि
ढकमक्क
फूल फुले जस्तो हुन्छ
तर,
तिम्रा कलमहरुले
होश हराएको दिन
चकमन्न
घाम लागेको बेला पनि
अँधेरो थोपर्न खोजे जस्तो हुन्छ

त्यसैले मलाई
भन्न मन लाग्छ
जति महान छन्
तिम्रा कलमका विवेकहरु
त्यति नै तुच्छ छन्
तिम्रा कलमका हिँसाहरु !

काठमाण्डौ