प्रल्हाद पोखरेलफागु वर्षा
मदनोत्सवको वेला होलीको लयमा रमी
मनाऊँ फगुवा पर्व हर्षवर्षा नहोस् कमी
होली होस् कि त होस् फागु वर्षा आनन्दको गरी
रमाऊँ प्रेम, सद्भाव, स्नेह–सौजन्यले भरी ।
सोझ्याई व्यङ्ग्यको वाण मिसाई हास्यको रस
गाऊँ उमङ्गको गीत मिली सम्पूर्ण कोरस
उघारी मनको दैलो बजाऊँ दिव्य बाँसुरी
ठोकौँ मादलमा ताल खुलाई स्वरमाधुरी ।
मदनोत्सवको मौका होली खेल्छन् हिमालय
गौरी–शङ्कर ताकेर चुम्छन् सूर्य हिमालय
अँगाली रजनीलाई इन्द्रेनी रङ्ग साथमा
तानी उषा महारानी झुल्छन् सूर्य प्रभातमा ।
हाल : चरिकोट, दोलखा
