तपाईंलाई थाहा छ कि छैन कुन्नि, गौतम बुद्धको जन्मस्थल लुम्बिनीमा कुनै पनि प्राणीको हिंसा गर्न नपाइने कुरा मलाई त पिकनिक जाँदा थाहा भएको हो । भर्खर मात्र हामीले त्यो क्षेत्रमा खसी काट्न मनाही छ भन्ने थाहा पाएर बाहिरैबाट काटिएको मासु लगेका थियौँ । त्यतिखेर त्यहाँ एउटा ठूलो तलाउ बनाइँदै थियो माछा पाल्न । माछा त सिङ्गै भुट्न पाइने भो । नमारीकन माछा प्रशस्त पाइने भएपछि घट्दै गएका पर्यटकहरू बढ्ने भए । फेरि त्यो क्षेत्र शान्तिक्षेत्र भैहाल्यो । कसैले मार्ने डर भएन । डोजर लगाएर खन्दै गरिएको तलाउमा थुप्रै माछा पाल्न सकिने थियो । हामीले परिक्रमा गरीगरी हेरेको अभैm ताजै छ । 
उता पोखरामा माछाको अभाव भएर पर्यटकको सङ्ख्या घट्न थालेको निष्कर्ष निकाली फेवातालमै माछा छोडिएको कुरा भुरा रेडियोहरूले भट्याएका थिए । दङ्ग थिए पोखराबासीहरू अब फेवातालमै माछा उम्रन थालेपछि पर्यटकको धुइरो लाग्ने भो भनेर ।
विश्वका जुनसुकै दशका माछालाई पनि लुम्बिनी उपयुक्त हुने ठहर सबैको थियो । त्यसैले त्यहाँ झन् संसारभर पाइने माछाका भुरा छोडियो भनेर त्यस क्षेत्रका भुरे रेडियोहरूले भट्याए । तपाईंले पनि भोग्नुभयो पक्का यस पटकको बर्खामा नेपालमा ठूलै वर्षा भयो, बाढी आयो, तहसनहस भयो सारा देश । सरकारले यस पटक सर्वाधिक वर्षा भयो भन्ने तथ्य निकाल्यो । अर्थ मन्त्रालयका अनुसार गएको वर्षमा एक खरब उन्सत्तरी अरब कुन्नि कति करोड लाख मिलिमिटर वर्षा भयो ।
बाढी पैह्रोले मान्छेलाई त मारेकै थियो । मान्छे जाबो मर्दा के चिन्ता लिनु, राहतकोषमा रकम जम्मा भैहाल्छ, क्षतिपूर्ति पाइहाल्छन् जनताले । चिन्ता त माछाको पो भो । बाढीले फेवातालका माछा स्वात्तै बगाएर पु¥याएछ नि बारा । उता लुम्बिनीका तलाउका माछा पनि ह्वात्तै निजगढमा थुप्रिए । हैन फेवातालबाट त ओरालो थियो गयो तर लुम्बिनीबाट कसरी गयो– सम्मै छ सबैतिर भन्नुहोला तपाईं । कुरा ठिकै पनि हो । लुम्बिनीबाट त इण्डियातिर बग्नुपर्ने, हैन त्यता खुर्दलोटन छ भन्ने बिर्सनु भो कि क्या हो । अनि पुग्दैनन् त माछाहरू बारा तिर, बाँकी रहे अब त्यहाँ भ्यागुता मात्र । बिचरा लुम्बिनी र पोखराबासीहरू भए माछो माछो भ्यागुतो ।
बम्घा, गुल्मी