Author Details

  • शेखर विकल्प Total Record 22

    भीमसेनको आशौच बारेर
    उभिएको छ धरहरा !

    कसैले च्यात्न नसकेका
    समयका सन्धि
    जोगाउँदैछ नारायणहिटी !

    मीठा सपना बाँडेर छिर्न हतार
    राता पार्सपोट थुन्न आतुर छ
    सम्मेलन केन्द्र !

    युवा बेचेर डलर छाप्न
    आतुर छन् विभागीय सरकारी अड्डाहरू !

    दिनहुँ जङ्गे पिलर सरेको सर्यै छ,
    टुलुटुलु हेर्नु बाहेक
    के गरोस् शीतलनिवास !

    कमलपित्ते जीवन बोकेर
    यौवनको मोलमोलाई
    र दलाली गर्दैछ रत्नपार्क !

    पितृदेवो भव र मातृदेवो भवको
    प्रवचन सुनाउँछ
    अपहेलित पूर्वजवान जम्मा गरेर पशुपति !

    पश्चिमको निर्दोष साइँलाको हत्या
    र पूर्वकी चेलीलाई
    नदी पारिकाबाट भएको बलात्कारको
    दृश्य प्रत्यक्ष प्रसारण गर्दैछ सिंहदरबार !

    चेली ब्यापारीलाई कौडीको धरौटीमा
    रिहाईको फैसला गर्दैछ
    सर्वोच्च न्यायालय !

    सडकमा जाम खन्याएर
    वायुमा वाहनका धूँवाको सिरक ओढाउँदै
    समयको उल्टो गतीमा बगेका मनुवालाई
    रोक्न खोज्दैछ घन ठोकेर घण्टाघर !

    वीरताको गाथा र इतिहासमा
    ढल मिसाएर बग्दैछ वागमती !

    छिमेकीहरू
    बुद्ध र सगरमाथा छापेर जुतामा,
    बजार्छन् दरबारका आँगनमा,
    साम्राज्यको पदचाप सुन्नु बाहेक
    के गरोस् बालुवाटार !

    यसै बीच
    घुमिरहेछन् अक्टोपसका हातहरू
    आयातित चस्मा भिरेर
    आफ्नै भ्रुण खोज्दै काठमाण्डुमा ।

    ‘अक्षरहरूको रङ’बाट