राष्ट्रघाती चुन्यौ फेरि
बाटो काटी हिँड्न थाल्यौ तिनकै कुरा सुन्यौ फेरि
टुप्पो चढाई फेद हान्ने अन्तर्घाती चुन्यौ फेरि
क्ुरै खाने कुरै लाउने गालपारा चिन्दाचिन्दै
सम्बन्धमा भाँजो हाल्ने खुराफाती चुन्यौ फेरि ।
सिद्धान्तका डिङ् हाँक्ने बुख्याँचालाई बुझ्दा बुझ्दै,
सत्ता पाउँदा सती जाने आत्मघाती चुन्यौ फेरि ।
रामनामीको फेटा गुथी जेथा लुट्ने जान्दा जान्दै
चमत्कारको बुटी बेच्ने जनघाती चुन्यौ फेरि ।
अस्मिताको बेपार गर्ने कारोबारी भन्दा भन्दै,
घरआँगनकै बैना बुझ्ने राष्ट्रघाती चुन्यौ फेरि ।