सूर्यले ह्वाररर आगो ओकल्दा
गर्मीले भतभत छट्पट चल्दा
तरतर हरपल पसिना बग्दा
खोज्छु हिमाल म, ऊ छ बेपत्ता !

तुवाँलोले सिर पाउ छोपी
डाँडा पारि निदाएको हो कि !
नाम निशाना कतै देखिँदैन
हिमाल ! हिमाल !! जति कराउँ छैन !

जिनतिन गर्मी महिना जान्छ
जाडोले लुगलुग जब जिउ काम्छ
ड्याम्म हिमाल नाकै अगाडि
हिमाल अगाडि हिमाल पछाडि !

फर्क हिमाल जाऊ अहिले नआऊ
जाडो भरीलाई मुख नदेखाऊ
गर्मीमा आउनू शितल ल्याउनू
म नाचौँला तिमी सुसेल्नू ।

बत्तिसपुतली, काठमाडौं