देश बनाइन्छ कि भनी
बडा हाकिम भइयो
केही जिम्मेवारी समाल्दै
जिल्लातिर गइयो
सुशासन चलाउनलाई
कडा हाकिम भइयो
त्यसो हुँदा
कतिले बौलाहा हाकिम भने
कतिले सन्काह हाकिम भने
हुँदा हुँदा
पियनसम्मले झन्काहा हाकिम भने
आजभोलि
अलिअलि पार्टीभोजमा गाको छु
त्यसैले म सद्दे हाकिम भाको छु ।

ढिलासुस्तीलाई जनाइ गरेँ
घुस खाने खुवाउनेलाई मनाही गरेँ
कहिले मेची कहिले काली
कहिले तराई कहिले हिमाली गाको छु
यै देशको नागरिक भएर पनि
नरकको जस्तो सजाय पाको छु
आजभोलि कसैले खाऔं भने पछि
अलिअलि चिया जुस खाको छु
त्यसैले म सद्दे हाकिम भाको छु ।

घुस खान दिन्न भन्दा
कहिले यो पार्टीको मान्छे
कहिले त्यो पार्टीको मान्छे
नाप्पिएको हाकिम भन्न थाले
अनेक आरोप लगाउदै
पार्टीमा उजुरी नै हाले
गुन्डागर्दी देखाउँदै
टेबुल कुर्सी ठटाए
कार्यकर्ता कुरा सुन्दै नेताले
सरुवाको चिट्टी पठाए

कसैले भेटी चढाए पनि
नचढाए पनि
म मन्दिरको मूर्ति भाको छु
आँखा चिम्ली दिएपछि
आजभोलि
म झन सद्दे हाकिम भाको छु ।

ढिला सुस्ती रोक्न खोज्दा
मिचाह हाकिम भन्न थाले
जनसेवा गराउन खोज्दा
रिसाहा हाकिम भन्न थाले
टिमवर्क गर्न खोज्दा
आप्mनै खेदो खन्न थाले
आजभोलि गान्धारीको जस्तै
आँखामा पट्टी लाको छु
त्यसैले म
झन सद्दे हाकिम भाको छु ।
दाङ, हाल– काठमाडौं