भिखारी
शहरमा एउटा घर छ
त्यो घरमा एउटा कार छ
हिराको पनि हार छ
पारी पाखामा
घडेरी हुने टार छ
तर के गर्ने भोलेश्वोर
म त भिखारी नि रैछु
त्यसैले हजुरसँग अझै
मागेको मागैछु ।
मैले हजुरसँग मागे जस्तै
अर्को भिखारिले मसँग माग्छ
सुर चले दिन्छु
नभए खाली हात भाग्छ
सोच्छु हजुरलाई पनि
के त्यस्तै लाग्छ ?
हजुर मेरा मालिक
ऊ पनि मलाई मालिकै भन्छ
भन्नुस् त ख्वामित
एउटा भिखारी अर्को भिखारिको
कसरी मालिक बन्छ ?
छोरो परार विदेश गयो
छोरी यसपाली गई
बुढी पनि सुब्बा थिई
यो पाली हाकिम भई
तर प्रभु गर्नु पर्ने कुरो
अझै ताँती छ
लामो लिस्ट नै बनाउँछु
माग्नु पर्ने धेरै बाँकी छ
के गर्ने डोलेश्वर
म त भिखारी नै रैछु
त्यसैले त हजुरको पछि लागेको लाग्यै छु ।
त्यो भिखारी पनि
मेरो पिछा लागेको लागेको लागैछ
छैन भने पनि मसँग मागेको मागैछ
म लाख कमाउँदा
उ सय कमाउछ
एक रुपैया पायो भने पनि
म भन्दा धेरै रमाउँछ ।
ऊ कचौरामा थाप्छ
म बक्सामा थाप्छु
ऊ मस्त र आनन्दित देखिन्छ
तर म यो भएन त्यो भन्दै खाली फलाक्छु ।
मागेको माग्यैछु प्रभु
हजुरको पिछा लागेको लागैछु
लाग्छ अब त
त्यो भन्दा त ठुलो भिखारी म पो रैछु ।
दाङ, हाल : काठमाडौं