मन्त्रीको पछि पछि
विदेशमा मन्त्री आए
मन्त्रीको पछि पछि
हतारिँदै बथान भए
छेउ छाउमा पसि ।
कोही ‘हजुर’ भन्छन्
हात जोडी गनगन
दौडादौड खुब सत्कार
गुमाइ बिर्सि आफ्नोपन ।
मन्त्रीसँग फोटो खिच्न
तँछाड मछाड कस्तो
डिभी पिआर सबैजना
संसार नै जिते जस्तो ।
कहाँ गयो तिम्रो आफ्नो
प्रतिष्ठा र पहिचान
परिजीवी झैँ किन अर्कामा
लुकाउँदैछौ मान र शान ।
तिमी पनि त केही हौ
किन नुहेको त्यस्तो
तिमी पनि त केही छौ
छैन कोही यहाँ सस्तो ।
मन्त्रीको पछि उभिएर
छाती र नाक फुलाउने
मन्त्रीकै नामसँग जोडिएर
आफ्नो नाम खुलाउने ।
विदेशमा पनि चाप्लुसी
खै त तिम्रो अस्तित्व
सदा गर आफ्नो सम्मान
सबैको छ आफ्नै व्यक्तित्व ।
लस एन्जेलस