फुलेको जवानी
सम्झनामा वत्ति फूलेको
‘फ्ल्यास प्याक’ चम्केको छ
विजुली चम्केझैं
आकाश सुसेलीमा रमाएझैँ{{read_more}}
एउटा बुढो रुख
फेरि तङ्रिँदै छ
अस्ताउनु अघिको ‘घाम’ हो
डाँडापारिको ‘जुन’ हो
‘घाम’ र ‘जुन’ को समिश्रण हो जीवन
आगो र पानीको मिलन हो जीवन
बाटोमा उसको एउटा पैताला आगो हुँदा
अर्को पैताला पानी भयो
दुवै पैताला आगो भएको भए
ऊ कोपिलामै खरानी हुन्थ्यो
दुवै पैताला पानी भएको भए
उ बाढीको चपेटामा बेवारिस हुन्थ्यो
समयले उसको वैंशको रथलाई
पुन चावुक हान्दै छ
कृष्ण सारथी बनेर
उ भित्रको अर्जुन ब्यूँझाउँदै छ
गाण्डीव उचाल्ने आदेश दिँदैछ
किल्ला किल्लामा ‘गजधम्म’ बसेका
धृतराष्ट्रहरूका विरुद्धमा
रुखका टोड्कामा बसेका
छद्मभेषीहरूका विरुद्धमा
सम्झनामा बैंश फुलेको फ्ल्यास ब्याक चम्केको छ
एउटा बुढो रुख फेरि तङ्रिँदै छ ।