सात ठोकान
१.
पारि तर्न सक्नुहुन्छ, पुल माथि छ
हिजोदेखि आजैसम्म कूल माथि छ {{read_more}}
किन खिन्न बन्नुहुन्छ चुपचाप बस्नोस्
अप्ठेरोमा पर्नुहुन्न, हुल माथि छ ।
२.
अघि बढ्ने बाटाभरि जाम लाग्या छ
आकाशमा थोरैलाई घाम लाग्या छ
पृथक् छैन मेरा लागि अतीत अनि आज
वर्षौंदेखि जिन्दगीमा डाम लाग्या छ ।
३.
इमान–जमान जम्मै छाड्नोस् पछि पर्न हुन्न
सत्य–निष्ठा त्याग्नोस् हजुर, त्यसको भर हुन्न
आफैँभित्र रुमल्लिँदै कराइरहनुभा’छ
ढोँगी, स्वार्थ बोक्नेसँग आत्मविश्वास हुन्न ।
४.
थन्क्याउनुहोस् विवेक–न्याय साँच्चै काम छैन
सिङ्गो बाँच्न नखोज्नुहोस् सग्लो नाम छैन
आफैँलाई हत्या गरी हाँस्न खोज्नेसँग
यत्रतत्र रावण छन्, अहँ राम छैन ।
५.
लोकतन्त्र गणतन्त्र नाम भएको छ
नारा मात्र एउटा सुन्दर खाम भएको छ
देखाउन काम लाग्छ जतनसँग राखौँ
ठेकेदारकै इशारामा जाम भएको छ ।
६.
सिकाउँथ्यौ अतीत उही, आज उही छ
उसकै इशारामा नाच्ने जाई–जुही छ
विगत र वर्तमान पृथक् छँदै छैन
सधैँसधैँ उसको छाया मेरो बुई छ ।
७.
परिभाषा काँध बोकी बाँच्न सकिन्न
परायाको गीतमा अहँ नाच्न सकिन्न
घाँटी थिची इच्छालाई, पर्खी बस भन्छौ
टुक्रिएको मन बोकी हाँस्न सकिन्न ।
स्वाभिमानबस्ती, बारा